മലബാർ എവിടെയൊക്കെ ? മലബാർ എന്നാൽ എന്തൊക്കെ ? മലബാറിനെ തിരിഞ്ഞ് ഒരു ലോകസഞ്ചാരം...
മലബാർ ടൌൺ എവിടെയാണ് ?
കാസർഗോഡ് മുതൽ പാലക്കാട് വരെ നീളുന്ന പ്രദേശത്തെ മലബാർ എന്നു വിളിച്ചു പരിചയമുള്ളവർ, പരിചിതമായ സ്ഥലങ്ങൾക്കിടയിൽ നിന്ന് ആ പട്ടണം കണ്ടുപിടിക്കാൻ ശ്രമിക്കും. പക്ഷേ, മലബാർ ടൌൺ അമേരിക്കയിലെ ഫ്ലോറിഡ സ്റ്റേറ്റിലാണ്. മൗണ്ട് മലബാർ എവിടെയാണ് ? കേരളത്തിന്റ വടക്കൻ പകുതിക്ക് മലബാർ എന്നാണു പേരെന്ന് കരുതി അതും വടക്കൻ കേരളത്തിലെവിടെയോ ആണെന്നു കരുതരുത്. ഇന്തൊനീഷ്യയിലെ ഉറങ്ങുന്ന അഗ്നിപർവത മാണത്. ഇനിയുമുണ്ട് പർവ്വതങ്ങളും സമതലങ്ങളും പക്ഷികളും പൂക്കളും പുസ്തകശാലകളും. കപ്പലും ട്രെയിനും ബസുമുണ്ട്. സൈനികാഭ്യാസമുണ്ട്, ബിരിയാണി പോലുമുണ്ട് മലബാർ എന്ന പേരിൽ!
മലപ്പുറം താനൂർ അയ്യായ മാഞ്ചപ്പറത്ത് മുഹമ്മദ് ശരീഫാണ് ലോകമാകെ മലബാറിനെ അന്വേഷിച്ചു നടക്കുന്നത്. പറന്നു കിടക്കുന്ന മലബാറുകളെ കണ്ടെത്താൻ, അവയെ തമ്മിൽ കൂട്ടിക്കെട്ടുന്നത് ഏതു നൂലാണെന്നു മനസ്സിലാക്കാൻ. പത്താം ക്ലാസ്സിൽ പഠനം നിലച്ചെങ്കിലും മലബാറിനെ കുറിച്ച് അന്വേഷിക്കാൻ, പടിപടിയായി പഠിച്ച് ഇപ്പോൾ ഹോസ്പിറ്റൽ മാനേജ്മെന്റിൽ എംബിഎ ചെയ്യുന്ന ശരീഫ് പിന്നീട് പേരൊന്നു മാറ്റി; ശരീഫ് മലബാർ. ചരിത്രവിദഗ്ധരുടെയും പഠിതാക്കളുടെയും പിന്തുണകൂടി വേണം ശരീഫിന്, ലഭിച്ച വിവരങ്ങൾ ഒരാവർത്തികൂടി ഉറപ്പിക്കാൻ, അവയെല്ലാം ഒരു ആധികാരിക രേഖയാക്കാൻ.
സീറോ മലബാർ കാത്തലിക് സഭയുടെ മലബാർ അല്ല ഡച്ചുകാരുടെ മലബാർ. അവരുട മലബാർ അല്ല ബ്രിട്ടീഷുകാരുടെ മലബാർ. കേരളത്തിലെ മലബാറിനു തന്നെ ഇങ്ങനെ പല രൂപങ്ങൾ. മലബാറിനെക്കുറിച്ച് പഠനങ്ങളേറെ നടന്നിട്ടുണ്ടെങ്കിലും അവ കേരളത്തിൽ ഒതുങ്ങിയെന്ന് ശരീഫ് കരുതുന്നു. ഭൂഖണ്ഡങ്ങൾ തമ്മിലുള്ള ഈർച്ചവാൾ ചോർച്ച പോലെ മലബാർ എന്ന് പേരുള്ള ഭൂപ്രദേശങ്ങളും സ്ഥാപനങ്ങളും ജീവിവർഗങ്ങളും പൊതുവായി പങ്കിടുന്ന കുടുംബവേര് കണ്ടെത്താനുള്ള ശ്രമം തുടരുകയാണ്.
ഒരുത്തരം തുറന്ന വഴി
ദുബൈയിലെ ഒരു ട്രാവൽസിൽ ജോലി ചെയ്യവേ, ഒരിക്കൽ കുറച്ച് ടൂറിസ്റ്റുകൾക്കൊപ്പം സഹായിയായി പോയി. അവർ ദക്ഷിണാഫ്രിക്കയിലെ പോർട്ട് മലബാറിൽ നിന്നാണെന്ന് പറഞ്ഞു. മലബാർ എന്നു കേട്ടപ്പോൾ കൗതുകം. വിശ
ദമായി ചോദിച്ചപ്പോൾ പോർട്ട് എലിസബത്ത് മലബാറാണെന്നും അതിന്റെ ചുരുക്കമാണ് പോർട്ട് മലബാറെന്നും അറിയുന്നത്. മറ്റൊരിക്കൽ അറബികൾ തന്നെ മലബാറിലേക്ക് ടൂർ പാക്കേജുണ്ടോ എന്ന് ചോദിച്ചു. മലബാർ ഐലൻഡ് എന്ന ഇന്ത്യൻ മഹാസമുദ്രത്തിലെ ദ്വീപായിരുന്നു അത്. അങ്ങനെയാണ് 'മലബാറുകളെ കണ്ടെത്തലി'നു തുടക്കമിട്ടത്.
32 രാജ്യങ്ങളിൽ മലബാർ!
സ്ഥിരീകരിച്ച വിവരം അനുസരിച്ച് 32 രാജ്യങ്ങളിൽ മലബാർ എന്ന പേരിൽ സ്ഥലങ്ങളുണ്ട്. മറ്റു രാജ്യങ്ങളിലും കേട്ടറിവുണ്ടെങ്കിലും ഉറപ്പിക്കാറായിട്ടില്ല. മല(പർവ്വതം), ബാർ(നിര)എന്നീ വാക്കുകളിൽ നിന്നാണ് മലബാറുണ്ടായതെന്ന് പൊതുവെ കരുതുന്നത്. മാൽ(സമ്പത്ത്), ബാർ(സ്ഥലം) എന്നീ വാക്കുകളിൽ നിന്ന് അറബികളുണ്ടാക്കിയ പേരാണ് മലബാർ എന്നു വിശ്വസിക്കാനാണ് ശരീഫിന് ഇഷ്ടം. പത്തേമാരിയുടെ പഴയകാലത്ത് മലബാർ എന്ന മനോഹരതീരത്തിന്റെ പേര് മാറ്റിടങ്ങളിലേക്ക് പകർന്നതായിരിക്കണം. പക്ഷേ അതിന് മുന്പും മലബാറുമായി ഒരു ബന്ധവുമില്ലാത്ത സ്ഥലങ്ങളിൽ മലബാറു'കൾ ഉണ്ടായിരുന്നത് ആശ്ചര്യമുണ്ടാക്കുന്നു. അന്വേഷണം തുടങ്ങിയപ്പോൾ പക്ഷികളും പഴങ്ങളും മത്സ്യങ്ങളും മനുഷ്യരുമെല്ലാം ഷെരീഫിന്റെ പട്ടികയിൽ വന്നുകയറി.
പഴക്കമെത്ര? അറിയില്ല
എഡി 970ൽ ജീവിച്ചിരുന്ന അൽ ബറൂനി എന്ന സഞ്ചാരിയാണ് മലബാർ എന്ന വാക്ക് ആദ്യം രേഖപ്പെടുത്തിയതെന്ന് കരുതുന്നത്. ആറാം നൂറ്റാണ്ടിൽ ഈജിപ്ഷ്യൻ കച്ചവടക്കാർ കേരളതീരത്തെ മാലി എന്നു വിളിച്ചതായി പറയുന്നു. അറബ് കച്ചവടക്കാർ ആയിരിക്കണം മലബാർ എന്ന വാക്ക് പരക്കെ ഉപയോഗിച്ചത്. ദക്ഷിണേദ്യക്കും ശ്രീലങ്കക്കും പൊതുവായുള്ള പേരായും പല വിദേശരാജ്യങ്ങളും മലബാർ എന്ന് ഉപയോഗിച്ചു പോന്നു. അറബുനാടുകളിലെത്തുന്ന ഇന്ത്യക്കാരെ ബഹുമാനപൂർവ്വം 'മലബാറി' എന്ന് വിളിച്ചു പോന്നു. മലയാളികളെയാകെ മലബാറികൾ എന്നു വിളിക്കാനാണ് അറബികൾക്ക് ഇന്നും ഇഷ്ടം.
മലബാറുകളുടെ മലബാർ
കേരളത്തിലെ മലബാറിനെപ്പറ്റി പൊതുവായി ലഭ്യമായ വിവരങ്ങൾ ഇങ്ങനെയെന്ന് ശരീഫ്: കോഴിക്കോട്ടെ നാട്ടുരാജ്യങ്ങളുടെ കാലത്തെ മലബാർ എന്നൊരു വിളിപ്പേര് കേട്ട്തുടങ്ങിയിരുന്നു. 1661ൽ കൊച്ചി ആസ്ഥാനമാക്കി ഡച്ച് മലബാർ സ്ഥാപിക്കപ്പെട്ടു. 1777ൽ കേരളത്തിന്റെ വടക്കൻ ജില്ലകളും കർണ്ണാടക തീരവും ഉൾപ്പെടുത്തി ബ്രിട്ടീഷ് ഈസ്റ്റ് ഇന്ത്യ കമ്പനി മലബാർ ജില്ലയ്ക്ക് രൂപം നൽകി. മൈസൂർ യുധത്തോടെ കൂടുതൽ പ്രദേശങ്ങൾ മലബാറിലേക്ക് വന്നു.1957ൽ കേരളം പിറന്നപ്പോൾ കാസർഗോഡ് മുതൽ പാലക്കാട് വരെയുള്ള ഭാഗങ്ങൾ സംസ്ഥാനത്തിന്റെ ഭാഗമായി. ഇപ്പോഴും തെക്കൻ കേരളത്തിന്റെ മറുപാതി വടക്കൻ കേരളമല്ല 'മലബാർ' ആണ്.
കപ്പൽ കയറിയ മലബാർ
1931ൽ ഏപ്രിൽ രണ്ടിന് ഓസ്ട്രേലിയയിലെ സിഡ്നിയിൽ നിന്ന് അകലെ എം വി മലബാർ എന്ന കപ്പൽ കടൽച്ചുഴലിയിൽപ്പെട്ടു. നിയന്ത്രണംവിട്ട കപ്പൽ ന്യൂ സൗത്ത് വെയിൽസിൽ നിന്ന് അകലെയുള്ള ദ്വീപിൽ ചെന്നുപെട്ടു. ബ്രാൻഡ് എന്നും ലോങ് ബേ എന്നുമൊക്കെ ഓസ്ട്രേലിയക്കാർ വിളിച്ചിരുന്ന ദ്വീപ്. ലോങ് ബേ ദുർഗുണപരിഹാര കേന്ദ്രത്തിന്റെ പേരിനോട് അനുബന്ധിച്ച് അറിയപ്പെടുന്നത് അവസാനിപ്പിക്കാൻ ദ്വീപിന്മലബാർ എന്ന് പേരിടണമെന്ന് ദ്വീപ് നിവാസികൾ ആവശ്യപ്പെട്ടു. 1933ൽ ആ പേര് സർക്കാർ വിജ്ഞാപനം ചെയ്തു. രണ്ടാം ലോകമഹായുദ്ധകാലത്ത് മലബാർ ഹെഡിലാണ്ട് സൈനികത്താവളമായി. 1968-1988 കാലത്ത് വ്യവസായ മാലിന്യങ്ങൾ തള്ളാനുള്ള സ്ഥലമായി. പിന്നീട് ദ്വീപ് പാട്ടത്തിന് വെച്ചു. ഗോൾഫ് ക്ലബ്ബുകളും റൈഫിൾ സംഘടനകളും കുതിരപ്പന്തികളും വന്നു. 2010ൽ ദേശിയോദ്യാനമായി പ്രഖ്യാപിച്ചു.
ആമ ദ്വീപും മലബാർ വംശവും
ഇന്ത്യൻ മഹാസമുദ്രത്തിലെ സെയ്ഷെൽസ് ദ്വീപ് സമൂഹത്തിലെ ദ്വീപുകളിലൊന്നിന് പേര് മലബാർ ഐലൻഡ്. അൽഡാബ്ര എന്നും പറയും. മനുഷ്യവാസമില്ലാത്ത ദ്വീപിന്മലബാർ എന്നു പേരു വന്നതിനെക്കുറിച്ച് കാര്യമായ കഥകളൊന്നുമില്ല. 'രാക്ഷസ ആമ' കളിൽ നല്ലൊരു പങ്കും ഇവിടെയാണ്. വംശനാശഭീഷണി നേരിടുന്ന പക്ഷിവർഗ്ഗങ്ങളുമുണ്ട്. 1982ൽ യുനെസ്കോ പൈതൃകകേന്ദ്രമായി. മൂന്നുമാസത്തിലൊരിക്കലുള്ള കപ്പൽ സർവീസിൽ ദ്വീപിലേക്ക് പോകാം; ഗവേഷകർക്ക് മാത്രം. ഇന്ത്യൻമഹാസമുദ്രത്തിന്റെ തെക്കുകിഴക്കൻ മേഖലയിൽ ഫ്രഞ്ച് അധീനതയിലായിരുന്ന റീയൂണിയൻ ദ്വീപിലെ 1.8 ലക്ഷം പേരുടെ വംശ പരമ്പരയെ വിളിക്കുന്നത് മലബാർസ് എന്നാണ്. പതിനേഴാം നൂറ്റാണ്ടിൽ തെക്കേ ഇന്ത്യയിൽ നിന്ന് പോയവരാണ് അവരെന്ന് കരുതുന്നു. ദ്വീപിനും മലബാർ എന്നുതന്നെ പേരുവന്നു.1848ൽ സ്വാതന്ത്രം നേടി. തമിഴ്, തെലുങ്ക് ഭാഷ സംസാരിക്കുന്നവരാണ് കൂടുതലും. ട്രിനിഡാഡ് ആൻഡ് ടുബാഗോയിൽ 1970 വരെ എത്തിച്ചേർന്ന കുടിയേറ്റക്കാർക്കായി ട്രിനിഡാഡ് സർക്കാർ തുടങ്ങിയ ഫാം ഹൗസ് പദ്ധതിയുടെ പേര് മലബാർ ഫാം ഹൗസ് പ്രൊജക്റ്റ് എന്നാണ്. അവിടെയുള്ള സ്കൂളിന്റെ പേര് മലബാർ പ്രൈമറി സ്കൂൾ.
അമേരിക്കയിലെ മലബാറുകൾ
അമേരിക്കയിൽ കാലിഫോർണിയയിലെ ലോസ് അഞ്ചലസ് പബ്ലിക് ലൈബ്രറിയുടെ അനുബന്ധ ലൈബ്രറിയാണ് ബോയിൽ ഹൈറ്റ്സിലെ മലബാർ ബ്രാഞ്ച് ലൈബ്രറി. ഒഹായോ സ്റ്റേറ്റിലെ മനോഹരമായ ഉദ്യാനത്തിന്റെ പേരാകട്ടെ മലബാർ സ്റ്റേറ്റ് ഫാം പാർക്ക്. പുലിറ്റ്സർ സമ്മാനജേതാവ് ലൂയി ബ്രോംഫീൽഡ് 1939ൽ സ്ഥാപിച്ചു. അകത്തെ ഭക്ഷണശാലക്ക് മലബാർ ഫാം ഇൻ എന്നും പ്രധാന ചടങ്ങിനു മലബാർ ഇവന്റ് എന്നുമാണ് പേര്.
മലബാർ റേഡിയോ
ഇൻഡോനേഷ്യയിലെ ഗുണാങ് മലബാർ എന്ന ഉറങ്ങുന്ന ഉറങ്ങുന്ന അഗ്നിപർവതം ഇപ്പോൾ വിനോദസഞ്ചാര കേന്ദ്രമാണ്. ഇൻഡോനേഷ്യയിൽ 1923ൽ ഡച്ചുകാർ സ്ഥാപിച്ച വയർലെസ് കേന്ദ്രത്തിന് പേര് മലബാർ റേഡിയോ സ്റ്റോർ എന്നായിരുന്നു. പിന്നീട് അത് മലബാർ റേഡിയോ സ്റ്റേഷനായി. മലബാർ മുസ്ലിം മസ്ജിദ് സിംഗപ്പൂരിലെ വിക്ടോറിയ സ്ട്രീറ്റിലാണ്.
നാവികാഭ്യാസം, അകത്തും പുറത്തും
എക്സർസൈസ് മലബാർ എന്നത് ഇന്ത്യയും അമേരിക്കയും ചേർന്നു 1992ൽ തുടക്കമിട്ട നാവികസേനാ അഭ്യാസപ്രകടനമാണ്. ജപ്പാൻ പിന്നീട് മൂന്നാം പങ്കാളിയായി. ഓസ്ട്രേലിയ, സിങ്കപ്പൂർ എന്നിവയും പങ്കാളിയായി.1998ൽ ഇന്ത്യ അണുവിക്ഷേപണം നടത്തിയപ്പോൾ നിർത്തിവെച്ചെങ്കിലും സെപ്റ്റംബർ 11 ആക്രമണത്തെ തുടർന്നുണ്ടായ സുരക്ഷ സാഹചര്യം പരിഗണിച്ച് പുനരാരംഭിച്ചു. സ്വാതന്ത്രസമരം അടിച്ചമർത്താൻ മലപ്പുറത്ത് ബ്രിട്ടീഷുകാർ തുടങ്ങിയ മലബാർ സ്പെഷ്യൽ പോലീസ്(എം എസ് പി) സംസ്ഥാനപ്പിറവിയോടെ കേരള പോലീസിന്റെ ഭാഗമായി.
കുരുമുളക്, മരുന്ന്, ചീര
പശ്ചിമഘട്ട മലനിരയുടെ സമ്പന്നമായ ജൈവവൈവിദ്യത്തിൽ പലതിനെയും ശാസ്ത്രലോകം മലബാർ എന്ന് ചേർത്തു വിളിച്ചു. മലബാർ ബ്ലാക്ക് - കുരുമുളക്, മലബാർ ചെസ്റ്റ് നട്സ് - അണ്ടിവർഗ്ഗത്തിൽപ്പെട്ട സസ്യം, മലബാർ പത്രം (മലബാത്തം, തമലപാത്രം) - കറുവപ്പട്ട കുടുംബത്തിൽപ്പെട്ട മരം, മലബാർ ചീര (വെള്ളിച്ചീര) - ഇലച്ചെടി എന്നിവയാണ് അറിയപ്പെടുന്ന'മലബാറി'സസ്യങ്ങൾ. കേരളത്തിലെ സസ്യലതാദികളെപ്പറ്റി ഹെന്റിക് റീഡർ പ്രസിദ്ധീകരിച്ച ഗ്രന്ഥത്തിലുമുണ്ട് മലബാർ; ഹോർത്തൂസ് മലബാറിക്കസ്.
മീനായി, കിളിയായി മലബാർ
ശ്രീലങ്കയിലും ഇന്ത്യയുടെ പടിഞ്ഞാറൻ തീരങ്ങളിലും കാണുന്ന മത്സ്യമാണ് മലബാർ ഡാമിയോ. പശ്ചിമഘട്ട താഴ്വരയിൽ കാണുന്ന കുയിൽ വിഭാഗത്തിൽപ്പെട്ട പക്ഷിയാണ് മലബാർ വിസ്ലിംഗ് ത്രഷ്. മനുഷ്യന്റെ ചൂളമടിയോട് സാമ്യമുള്ള ശബ്ദം പുറപ്പെടുവിപ്പിക്കുന്ന ഇവയെ മലബാർ വാനമ്പാടി എന്നും വിളിക്കാറുണ്ട്. ഇന്ത്യയിലും ശ്രീലങ്കയിലും കാണുന്ന നീണ്ടവാലുള്ള പക്ഷിയാണ് മലബാർ ട്രോഗൺ. പശ്ചിമഘട്ടത്തിൽ, കാണുന്ന കുരുവി ഇനത്തിനു പേര് മലബാർ ബാർബെറ്റ്. മലബാർ ഗ്രേ ഹോൺബിൾ, മലബാർ പൈഡ് ഹോൺബിൾ എന്നിവ കേരളത്തിന്റെ സ്വന്തം വേഴാമ്പൽ ഇനങ്ങളാണ്. മലബാർ വേരുക്,മലബാർ സ്പൈനി ഡോർമൗസ് (ചുണ്ടെലി) എന്നിവയാണ് മറ്റ് പ്രധാന ജീവികൾ. പടിഞ്ഞാറൻ പസഫിക് തീരങ്ങളിലും ആഫ്രിക്കൻ തീരങ്ങളിലും ചെങ്കടൽ ഭാഗങ്ങളിലും കാണുന്ന മത്സ്യമാണ് മലബാർ ഗ്രൂപ്പർ.
മലബാരിയും മലബാർ സിങ്ങും
ഗുജറാത്തിലെ എഴുത്തുകാരനും ബഹുഭാഷവിദഗ്ദനും സാമൂഹിക പരിഷ്കർത്താവുമൊക്കെയായ പ്രശ്സ്തന്റെ പേര് ബെഹ്റംജി മെർവാൻജി മലബാരി എന്നായിരുന്നു. ഇടക്കാലത്ത് തന്നെ സംരക്ഷിച്ച വ്യാപരിയോടുള്ള സ്നേഹപ്രകടനമായി ബെഹ്റംജി പേരിനൊപ്പം മലബാറിനു സ്ഥാനം നല്കുകയായിരുന്നത്രേ. നേപ്പാളിലെ രാഷ്ട്രീയ ജനമുഖി പാർട്ടിയുടെ നേതാവിന്റെ പേരാകട്ടെ, മലബാർ സിങ് ഥാപ്പ എന്നാണ്.
കടൽ, റെയിൽ, റോഡ്
1800കളിൽ ചരക്കുകടത്തിന് ഉപയോഗിച്ചിരുന്ന വൻകിട കപ്പലുകളിലൊന്നായിരുന്നു എച്ച് എം എസ് മലബാർ.1804ൽ കടലിലിറക്കി. മലബാറിനെ തെക്കൻ കേരളവുമായി ബന്ധിപ്പിച്ച് ഇപ്പോഴുമോടുന്ന മലബാർ എക്സ്പ്രസ്സ് വർഷങ്ങളുടെ പഴക്കമുള്ള ട്രെയിൻ സർവീസാണ്. കെ എസ് ആർ ടി സി വടക്കൻ കേരളത്തിൽ ഓടിക്കുന്ന ടി ടി ബസ്സുകൾക്കും പേര് മലബാർ.
ഹിൽസ്, കോളേജ്, സിനിമ
മുംബൈയിലെ വി ഐ പി താമസ - ഓഫീസ് മേഖലയാണ് മലബാർ ഹിൽസ്. മലബാർ ഹിൽ സ്പോർട്സ് ക്ലബ്ബും അവിടെയാണ്. മലബാർ ക്രിസ്ത്യൻ കോളേജ് ആകട്ടെ, കോഴിക്കോട്ട് 1905ൽ സ്ഥാപിതമായ ആർട്സ് ആൻഡ് സയൻസ് കോളേജ് ആണ്. മലബാർ പ്രിൻസസ് 2004ൽ ഇറങ്ങിയ ഫ്രഞ്ച് ചലച്ചിത്രമാണെങ്കിൽ, ബ്രിട്ടീഷ് സൈന്യാധിപൻ റൊണാൾഡ് സ്റ്റീഫൻ എഴുതിയ നോവലാണ് ദി ജുവൽ ഓഫ് മലബാർ.
(Source :മലയാളമനോര, ഞായറാഴ്ച്ച, 16,ഒക്ടോബർ 2016)
